عندي كلام كتير عن محمد نجم .. آسفة مسبقا إن ممكن يكون في الكلام حاجة عني والمفروض يكون كله عليه.
أنا عرفت محمد نجم عن طريق بوستس الفيس بوك بتاعته من حوالي ٦ سنين، فهمت منه كتير في مجال معرفش عنه حاجة، وطلبت صداقته وشرفني بالقبول.
الناس إللي تعرفني تعرف إني بعرف الناس لأشخاصهم وإنسانيًا في المقام الأول والأخير، والحقيقة إن محمد بنى معايا علاقة قد الهرم وعظمته، بنيناها طوبه طوبه، بس طوبه ثابته، نحكي ونرغي في أمور عامة وشخصية وعلى مدار السنين كلها مسمعتش منه كلام غير لائق ولا ذم في اشخاص اذوه بشكل مباشر، كل الكلام طيب وعفيف ومحترم وصادق، ونتفق إننا هنتقابل وتحصل حاجات تمنعنا، لحد ما جه ميعاد اللقا السنة إللي فاتت في مهرجان القاهرة السينمائي، مرتين نور فيهم محمد نجم المكان وفي المرتين سيبنا كل حاجة علشان نقعد معاه، ويومها البنا إللي بنيناه سوا ركز في الأرض واتختمنا بختم الأخوات.
لما كلمني يبلغني عن مرضه، واليوم ده مش بيختفى من ذاكرتي كنت سايقه ومن الخضه فضلت ماشيه بالعربية وهو بيكلمني لحد ما بقيت في طريق سفر وده مش طريقي، حكالي كل حاجة والبروتوكول إللي هياخده واتفقنا انه هيعدي ويتعامل مع الحكاية على انها دور برد.، وطلب محدش يعرف علشان مش عايز يقلق حد.
يبعتلي يقولي انا طالع النهاردة في برنامج كذا، والنبي اتفرجي وقوليلي رأيك، مرة قلتله حاجة لقيته في اللقاء اللي بعده عملها، وبعت يقولي انا بتعلم، أنا بحب اتعلم.
وعلى مدى رحلة العلاج القاسية جدا كان بيعافر وبصدق إلا الفترة الأخيرة.
محمد قبل ما يكون خبير اقتصادي وقبل ما يبقى بيشتغل فين أو مع مين.
محمد إنسان نموذج، بيذاكر وبيبحث وعنده نهم للمعرفة لا ينتهي وبيشتغل، صادق ومحترم ونبيل وطيب وشريف و حقيقي غير طامع.
كان عنده احلام كتير عايز يحققها وكان قادر يحققها بأساليب كتير، لكن كان مختار الشرف والشقى ولم يتنازل عنهم ابدّا
التكريم إللي بيحصل لمحمد حاليًا طبيعي جدًا
لأنه تكريم للصدق وللمثابرة وللتعلم وللبحث وللإجاده وللشرف والأخلاق، إللي مش ممكن تكون نتيجتهم غير خير في دنيا وفي آخره
ربنا يسعدك يا محمد في الجنة يا أخويا الصغير وصديقي صاحب المقام الكبير.
